Ferðalag til Suðurameríku

Eldsnemma á sunnudagsmorgunin munum við halda út á Keflavíkurflugvöll þar sem okkar bíður flug með Icelandair til London. Frá London munum við svo fljúga, síðar um kvöldið, til Sao Paulo í Brasilíu. Flugið þangað er tæplega 15 klukkustundir. Frá Sao Paulo hefst svo ferðalag yfir til Buenos Aires í Argentínu, þaðan yfir til Santiago í Chile. Í Chile ætlum við að fara í stjörnuskoðun í nokkra daga. Ó hvað ég hlakka til þess að sjá suðurhimininn almennilega. Frá Chile verður ferðinni haldið til La Paz í Bólivíu en þaðan verður síðan farið til Perú. Í Perú er ætlunin að sjálfsögðu að skoða Machu Picchu. 

Eftir að hafa skoðað Perú er ferðinni heitið upp til Ekvador. Í höfuðborginni Quito stöldrum við stutt við en förum í viku ævintýraferð á slóðir Charles Darwins út í Galapagos-eyjar.  Eftir ævintýrið á Galapagos fljúgum við frá Quito upp til Panama og þaðan niður til Rio de Janeiro í Brasilíu.

Þann 23. ágúst höldum við heim á leið eftir næstum þriggja mánaða ferðalag. Við munum skrifa hér ferðasöguna og setja inn myndir úr ferðinni.